មេរោគ​ជំរិត​ទារ​ប្រាក់ WannaLocker លើ​ប្រព័ន្ធ​ប្រតិបត្តិការ Android

មេរោគ​ជំរិត​ទារ​ប្រាក់ WannaLocker លើ​ប្រព័ន្ធ​ប្រតិបត្តិការ Android

WannaLocker ជា​ប្រភេទ​មេរោគ​ជំរិត​ទារ​ប្រាក់ ដែល​ស្រដៀង​នឹង​មេរោគ WannaCry ដែល​បាន​វាយលុក​ពិភព​លោក​អំឡុង​ខែ​ឧសភា ឆ្នាំ ២០១៧ ។ លើស​ពី​នេះ​ទៀត WannaLocker បាន​បន្ថែម​នូវ​មុខងារ​មួយ​ចំនួន​ដូចជា មុខងារ​បញ្ជា​ទូរស័ព្ទ​ជនរងគ្រោះ​ពី​ចម្ងាយ (Remote Administration Tool - RAT) និង​មុខងារ​លួច​ព័ត៌មាន​ហិរញ្ញវត្ថុ (Banking Trojan) ។ បច្ចុប្បន្ន​មេរោគ​នេះ​កំពុង​ផ្ដោត​គោលដៅ​វាយប្រហារ លើ​បណ្ដា​អ្នក​ប្រើប្រាស់​ទូរស័ព្ទ​ដែល​មាន​ប្រព័ន្ធ​ប្រតិបត្តិការ Android ក្នុង​ប្រទេស​ចិន តាមរយៈ plugin របស់​ហ្គេម​ដែល​កំពុង​ពេញ​និយម (King of Glory) ក្នុង​ប្រទេស​មួយ​នេះ ។

បន្ទាប់​ពី​ឆ្លង​មេរោគ WannaLocker ទូរស័ព្ទ​រងគ្រោះ​នឹង​ប្ដូរ​រូបភាព​ជា​រូប​តុក្កតា ចំណែក​ឯកសារ​ក្នុង External Storage នឹង​ត្រូវ​ជាប់​លេខ​សម្ងាត់ និង​លេចឡើង​ផ្ទាំង​ផ្ដល់​ព័ត៌មាន ដើម្បី​បង់​ប្រាក់​ដោះ​លេខ​សម្ងាត់​ឯកសារ​ទាំងនោះ ។

ខាង​ក្រោម​នេះ​គឺ​ជា​វិធីសាស្ត្រ​មួយ​ចំនួន ដែល​អាច​ការពារ​ទូរស័ព្ទ​ដៃ​របស់​អ្នក​ពី​មេរោគ ឬ​ការ​បាត់បង់​ឯកសារ ៖
១) ត្រូវ​មាន​ការ​ប្រុងប្រយ័ត្ន​នៅ​ពេល​ទាញ​យក​កម្មវិធី​ផ្សេង ៗ ជា​ពិសេស​ពី​ប្រភព​មិន​ច្បាស់លាស់
២) ដំឡើង​កម្មវិធី​ការពារ​មេរោគ​ក្នុង​ទូរស័ព្ទ
៣) ធ្វើ​ការ Backup ឯកសារ​សំខាន់ ៗ
៤) ធ្វើ​បច្ចុប្បន្នភាព​ប្រព័ន្ធ​ប្រតិបត្តិការ​ទូរស័ព្ទ​ជា​ប្រចាំ ។

អត្ថបទ​និង​រូបភាព៖ នាយកដ្ឋានព័ត៌មានវិទ្យា ក្រសួងមហាផ្ទៃ
សម្រួល​អក្ខរាវិរុទ្ធដោយ ហេង-រង្សី